Son zamanlar Bakı şəhərində ağcaqanadların sayı artıb. Bu da əhalinin narahatlığına səbəb olur. Əvvəllər yaşayış binaları ətrafında, müəyyən ərazilərdə bu həşəratlara qarşı dezinfeksiya işləri aparılırdı. Bəs indi vəziyyət necədir? Ağcaqanadlarla mübarizə üçün hər hansı tədbir görülürmü?
Öncə ağcaqanadların artma səbəblərini müəyyən edək. Biologiya üzrə elmlər doktoru Nəsib Namazov modern.az-a açıqlamasında bildirib ki, ağcaqanadlar ən çox axmaz su mənbələrində, qamışlıqda, su axarı olmayan yerlərdə olur: “Şəhərlərdə, adətən, zirzəmilərdə ağcaqanadlar daha çox olur və onlar 12 aya inkişaf edir.
Əvvəllər tonlarla xlorlu, fosforlu üzvü birləşmələr gəlirdi və rayonlarda gigiyena və epidemologiya mərkəzlərinə mövsümlə bağlı əlavə ştatlar verilirdi. Bu ştatların sayı müəyyən yerlərdəki vəziyyətə uyğun olaraq martdan sentyabra kimi ola bilirdi. Hər gün seysematik mübarizə getdiyi üçün əvvəllər ağcaqanadlar az idi. Son zamanlar bu cür tədbirlər təxirə salındığına görə ağcaqanadların inkişafı qaçılmazdır”.
Doğurdanmı ağcaqanadlara qarşı hər hansı tədbir görülmür?
Modern.az məsələni aydınlaşdırmaq üçün Respublika Dezinfeksiya Mərkəzi ilə əlaqə yaradıb. Mərkəz əməkdaşının sözlərinə görə, ağcaqanadlarla mübarizə aparmaq üçün onlar Bakı Mənzil Kommunal Təsərrüfat birlikləri ilə müqavilə bağlamalıdırlar. Lakin hazırda heç bir müqavilədən söhbət gedə bilməz: “Mənzil Kommunal Təsərrüfat birlikləri əvvəl bizim tabeliyimizdə olan təsərrüfat müəssisələri ilə müqavilə bağlayırdılar. Buna uyğun olaraq müəssisələrimiz rayon ərazilərində işlər aparırdı. Təkcə ağcaqanadlara qarşı yox, həm də gəmiricilərə qarşı mübarizə gedirdi. Sadəcə olaraq, son zamanlar Mənzil Kommunal Təsərrüfat birlikləri bizimlə müqavilə bağlamaqdan imtina ediblər. Bizdə olan məlumata görə, onlar hansısa özəl müəssisələrlə müqavilə bağlayırlar. İşlərin nə dərəcədə getdiyini bilməsək də, sakinlər çox narazılıq edir. Onların gördüyü işlərin heç bir nəticəsi olmadığı üçün sakinlər bizə müraciət edirlər”.