Məhkəmə Dortmundun “Borussiya” futbol klubunun avtobusuna hücumda şübhəli bilinən 28 yaşlı Sergey V. barəsində həbs qətimkan tədbiri seçib. Ucnoqta.az Apa-ya istinadən xəbər verir ki, saxlanılan şəxsin ikili vətəndaşlığı var. O, həm Almaniya, həm də Rusiya pasportu daşıyır.
Aprelin 11-də Dortmundda Çempionlar Liqasının 1/4 final mərhələsi çərçivəsində “Borussiya” və “Monako” klubları arasında oyun keçirilməli idi. Oyuna təxminən bir saat qalmış meydan sahiblərinin avtobusunun yaxınlığında 3 partlayış törədilmiş, “Borussiya”nın futbolçusu Mark Bartra insident zamanı yaralanmışdı.
Prokurorluğun məlumatına görə, şübhəli şəxs “Borussiya”nın səhmlərindən 15 minini alıb. O, bunun üçün aprelin 3-də kredit götürüb. Səhmlərin kursunun dəyişməsi təqdirində Sergey V. qiymətli kağızların satışından 4 milyon avro qazanc əldə edə bilərdi. Qeyd edək ki, Sergey V. aprelin 21-də Tübinqen şəhəri yaxınlığında saxlanılıb.