Aprelin 5-də Şəkidə “Çağdaş təhsildə təşkilatlanma: Yeni nəsil tərbiyəsi” adlı forum keçirilib.
Ucnoqta.az xəbər verir ki, Azərbaycan Gənc Müəllimlər Assosiasiyasının (AGMA) təşkilatçılığı, Şəki-Zaqatala Regional Təhsil İdarəsinin tərəfdaşlığı və “Azərbaycan müəllimi” qəzetinin informasiya dəstəyi ilə keçirilən forumda 200-ə yaxın gənc müəllim iştirak edib.
Forum Dövlət Himninin səsləndirilməsi ilə başlayıb, Ulu Öndər Heydər Əliyevin və şəhidlərin xatirəsi bir dəqiqəlik sükutla yad edilib.
Şəki-Zaqatala Regional Təhsil İdarəsinin müdiri Günay Mahmudova gənc müəllimlərin maarifləndirilməsi baxımından AGMA-nın regionlarda təşkil etdiyi belə tədbirlərin əhəmiyyətini xüsusi vurğulayıb. Forumun keçirilməsində məqsəd çağdaş dövrdə yeni nəsil tərbiyəsinə yeni yanaşmaların tətbiq olunması və müəllimlərlə fikir mübadiləsinin aparılmasından ibarətdir.
Azərbaycan Gənc Müəllimlər Assosiasiyasının sədri Pərvinə Qədimova, Milli Məclisin deputatı Mehriban Vəliyeva və Azərbaycan Psixologiya Akademiyasının direktoru Ramil Hüseynzadə də çıxış edərək, forumun mahiyyəti və aktuallığı barədə danışıblar. Onlar müasir təhsil sistemində nəsil tərbiyəsinin vacibliyini vurğulayaraq, bu istiqamətdə həyata keçirilən yeniliklər və innovativ metodlardan bəhs ediblər.
Rəsmi hissədən sonra Rasim Ocaqov adına Şəki şəhər Uşaq-Gənclər İnkişaf Mərkəzinin “Bahar” rəqs qrupunun çıxışı olub.
Forum panel müzakirə ilə işini davam etdirib. AGMA-nın Şəki şəhəri üzrə koodinatoru Gülnar Heydərzadənin moderatorluğu ilə keçən panel müzakirədə spikerlər – Şəki rayonu Kiş kənd Heydər Əliyev adına 1 nömrəli tam orta məktəbin ibtidai sinif müəllimi Dursun Cavadova, Qax şəhər Namiq Abdullayev adına 2 nömrəli məktəb-liseyin Azərbaycan dili və ədəbiyyatı müəllimi Nazlı İsmayılova və Şəki rayonu Köndələn kənd tam orta məktəbin direktoru Aytən Yusifova çıxış edərək, təhsildə tərbiyəvi mühitin yaradılması, ailənin tərbiyə üzərindəki rolu, rəqəmsal dövrdə tərbiyə və etik dəyərlər, yeni nəsil tərbiyəsinə dair innovativ yanaşmalar və digər mövzular barədə danışıblar. Müzakirələr zamanı, həmçinin təhsildə müasir metodların tətbiqi, müəllim-şagird münasibətlərinin yeni dövrün tələblərinə uyğun şəkildə qurulması və psixoloji yanaşmaların əhəmiyyəti vurğulanıb.
Forum iştirakçıları bu kimi tədbirlərin təhsil sistemində keyfiyyətin artırılması və pedaqoji təcrübənin bölüşdürülməsi baxımından mühüm rol oynadığını bildirib, yeni nəsil tərbiyəsində qarşıya qoyulan məqsədlərə çatmaq üçün belə forumların davamlı keçirilməsinin vacibliyini vurğulayıblar.
