Oktyabrın 31-də Məktəbəqədər və Ümumi Təhsil üzrə Dövlət Agentliyinin direktoru Eşqi Bağırov Qarabağ Regional Təhsil İdarəsinin müdiri Sənan Mənsimlini kollektivə təqdim edib.
Məktəbəqədər və Ümumi Təhsil üzrə Dövlət Agentliyindən Ucnoqta.az-a verilən məlumata görə, açılış nitqi ilə çıxış edən Agentliyin direktoru "Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı" çərçivəsində görülən işlərdən bəhs edərək bu istiqamətdə qarşıya qoyulan hədəfləri diqqətə çatdırıb. O, tədrisin keyfiyyətinin yüksəldilməsi, müasir tədris metodlarının tətbiqi, təhsilalanların vətənpərvər ruhda tərbiyəsinin əsas prioritetlərdən olduğunu vurğulayıb.
Daha sonra Eşqi Bağırov Sənan Mənsimli kollektivə təqdim edib, bu missiyanın həyata keçirilməsində kollektivə uğurlar arzulayıb.
Sənan Mənsimli öz növbəsində ona göstərilən etimada görə təşəkkür edərək regionda təhsil sahəsində qarşıya qoyulan hədəflərə çatmaq üçün üzərinə düşən vəzifəni layiqincə yerinə yetirəcəyini söyləyib.
Qeyd edək ki, bu vəzifəyədək Sənan Mənsimli Şirvan-Salyan Regional Təhsil İdarəsinin müdiri vəzifəsində çalışıb.
