Avropa Kosmik Agentliyinin (ESA) çəkisi iki tondan çox olan nasaz fəaliyyət göstərən ERS-2 peyki 2024-cü il fevralın ortalarında Yer atmosferində qismən yanacaq.
Ucnoqta.az xəbər verir ki, bu barədə ESA-nın rəsmi saytında məlumat verilib.
Mütəxəssislərin hesablamalarına görə, Yer kürəsindən təxminən 80 kilometr hündürlükdə peyk parçalara ayrılacaq və onların əksəriyyəti Yerə çatana qədər toza çevriləcək. Bununla belə, bəzi fraqmentlər planetin səthinə düşə bilər. Onların okeanda batma ehtimalı yüksəkdir. ESA zibilin tərkibində radioaktiv və zəhərli maddələrin olmadığına əmindir.
ESA mütəxəssisləri bir insanın peykin bir hissəsi tərəfindən vurulma şansını 100 milyardda 1 olaraq qiymətləndirdi ki, bu da ildırım vurmasının qurbanı olmaqdan 65 min dəfə azdır.
ERS-2 1995-ci ilin aprelində Yer orbitinə buraxılıb və missiyasını 2011-ci ilin sentyabrında başa çatdırıb. Cihaz planetin kosmosda tədqiqi üçün nəzərdə tutulmuşdu.
ESA 2011-ci ilin yayında 66 manevr edərək ERS-2-ni hələ xidmət müddəti bitməmiş sökməyə hazırlaşmağa başladı. Bu əməliyyatlar nəticəsində peykin qalan yanacağı tükənib və onun hündürlüyü Yer səthindən 785 kilometrdən 573 kilometrə endirilib.
Avropa Kosmik Agentliyi ERS-2-ni Avropada indiyə qədər hazırlanmış və buraxılmış ən qabaqcıl Yer müşahidə kosmik gəmisi adlandırıb.