"Lion" Səudiyyə Ərəbistanının "Əl-İttihad" klubunda problemlər yaşayan fransalı hücumçu Kərim Benzemanı geri qaytarmağa çalışır, lakin bu, maliyyə səbəblərinə görə asan olmayacaq.
Ucnoqta.az xəbər verir ki, bu barədə RMC Sport yazıb.
Klub, komanda sahibləri "Eagle Football Holdings"in Səudiyyə Ərəbistanı hakimiyyəti ilə yaxşı əlaqələrinin Benzemanın transferinə kömək edə biləcəyini gözləyir.
Benzema yayda "Əl İttihad"a keçərək 2026-cı ilə qədər müqavilə imzalayıb. Səudiyyə Ərəbistanında forvard 20 matçda 12 qol vurub.
Yanvarın 14-də futbolçunun vaxtında komandaya qayıda bilməməsi səbəbindən Benzemanın BƏƏ-dəki toplanışdan kənarlaşdırıldığı məlum olub.
Benzema 2004-2009-cu illərdə "Lion"da çıxış edib və klubla 7 kubok, o cümlədən dörd Fransa çempionluğu qazanıb. Daha sonra futbolçu 14 ilini keçirdiyi "Real Madrid"ə yollanıb və “Qızıl top”u qazanıb.