Zaqatala rayon Yuxarı Çardaxlar kənd R.Muradov adına tam orta məktəbin təsis edilməsinin 100 illiyi münasibətilə "Bir əsrin xatirəsi" adlı yubiley tədbiri keçirilib.
Ucnoqta.az xəbər verir ki, tədbirdə Rayon İcra Hakimiyyətinin başçısı Mübariz Əhmədzadə, Humanitar məsələlər üzrə şöbə müdiri Vəfa Süleymanova, Şəki-Zaqatala Regional Təhsil İdarəsinin Tədrisin keyfiyyəti sektorunun müdiri Bəhruz Nəbili, İnzibati təşkilat sektorunun müdiri Alqış Həsrətov, Zaqatala rayon təhsil sektorunun müdiri Kəmalə Əhmədova və sektor nümayəndələri, qazilər, təhsil ocağının məzunları, ictimaiyyətin nümayəndələri və digər qonaqlar iştirak ediblər.
Tədbiri giriş sözü ilə açan məktəbin direktoru Ramin Qarayev öncə qonaqları salamlayıb və təhsil müəssisənin tarixi inkişaf yolundan, qazandığı uğurlar barədə məlumat verib.
Rayon İcra Hakimiyyətinin başçısı Mübariz Əhmədzadə çıxış edərək məktəbin son illərdə nailiyyətlərinin yaxşılaşdığını, məzunların ali məktəblərə qəbul göstəricilərinin yüksəldiyini qeyd etmiş, məktəbin təcrübəli pedagoji kollektivinin olduğunu , müəllimlərin səylə çalışdıqlarını bildirib.
Daha sonra çıxış edən Şəki- Zaqatala Regional Təhsil İdarəsinin Tədrisin keyfiyyəti sektorunun müdiri Bəhruz Nəbili öncə 100 illik yubiley münasibətilə Şəki-Zaqatala Regional Təhsil İdarəsinin müdiri Bəhruz Mehdiyevin tədbir iştirakçılarına salam və təbriklərini çatdırmış, məktəb kollektivinə gələcək fəaliyyətlərində müvəffəqiyyətlər arzulamışdır.
Yubiley tədbiri şagirdlərin ifasında maraqlı konsert proqramı, ədəbi-bədii kompozisiyalarla davam edib.
Sonda gənc nəslin təlim-tərbiyəsi sahəsində uzun illər səmərəli pedaqoji fəaliyyətinə görə bir qrup müəllimə Regional Təhsil İdarəsinin fəxri fərman və hədiyyələri təqdim olunub.
