Türkiyə hakimiyyəti Ankaranın üçtərəfli memorandumda nəzərdə tutulan tələblərini yerinə yetirməyənə qədər İsveç və Finlandiyanın NATO-ya daxil olmasına razı olmayacaq.
Ucnoqta.az xəbər verir ki, bunu Türkiyənin xarici işlər naziri Mövlud Çavuşoğlu deyib.
"Tələblərimiz yerinə yetirilməyənə qədər onların NATO-ya üzvlüyünə "hə" deyə bilmərik. Hazırkı reallıqda parlament bu protokolu ratifikasiya etmir. NATO-nun yaradılması ideyası bloka üzv ölkələrin təhlükəsizliyini təmin etməkdir. Namizəd ölkələr Ankaranın bu sahədə mövqeyini nəzərə almalıdır”, - deyə o bildirib.
Çavuşoğlunun sözlərinə görə, Stokholm öz öhdəliklərini yerinə yetirdikdə Türkiyə İsveçlə NATO-ya üzvlüklə bağlı danışıqlara qayıtmağa hazırdır. "İsveç üzərinə götürdüyü öhdəlikləri yerinə yetirsə, o zaman oturub danışarıq. Amma hazırda İsveçin NATO-ya üzvlüyünü dəstəkləyə bilmərik", - nazir bildirib.
Onun qeyd etdiyi kimi, Türkiyə hazırda Finlandiyanın NATO üzvlüyünə namizədliyini İsveçdən daha müsbət hesab edir. "Biz əvvəllər demişdik ki, Finlandiyanın namizədliyinə daha pozitiv yanaşırıq. Bizim prezidentimiz də bu haqda danışdı. Amma NATO bu ölkələrin eyni vaxtda ölkəyə daxil olmasına razılıq vermək istəyir. Ərizələri ayırıb ayrı-ayrılıqda baxılması barədə qərar olarsa, o zaman Finlandiya ilə bağlı mövqeyimiz daha müsbət olacaq”, - deyə o bildirib.