"Koronavirus pandemiyası yeni başlayanda ilk vaxtlar Azərbaycanın xəstəxanalarında müəyyən avadanlıq çatışmazlığı vardı. Bugünkü layihə çərçivəsində bir çox avadanlıqların verilməsini təmin edə bildik".
Ucnoqta.az xəbər verir ki, bunu Ümumdünya Səhiyyə Təşkilatının (ÜST) Azərbaycandakı nümayəndəsi, ölkə ofisinin rəhbəri Hande Harmancı Sağlamlıq üçün Həmrəylik Təşəbbüsü layihəsinin bağlanış mərasimində çıxışı zamanı deyib.
O bildirib ki, həmin dövrdə tibb işçilərinin bilik və bacarıqlarının artırılması əsas hədəflərdən idi: "Bu sahədə Azərbaycan hökumətinə dəstək istiqamətində çalışırdıq. Əsas məqsədimiz ölkənin səhiyyə sisteminin hər hansı pandemiyaya qarşı mübarizə tədbirlərinə yüksək səviyyədə hazırlıqlı olmasıdır. Səhiyyə sahəsində həyata keçirilən layihələri məhz dövlət qurumları ilə birlikdə icra edirik ki, görülən işlər daimi və davamlı olsun, yaddan çıxmasın. Hər zaman Azərbaycanın səhiyyə sistemini dəstəkləmişik və bundan sonra da bu istiqamətdə əməkdaşlığımız davam edəcək".
H.Harmancı əlavə edib ki, Avropa İttifaqı ilə birlikdə Azərbaycanda həm COVID-19, həm də digər xəstəliklər üzrə vaksinasiya prosesinə dəstəklə bağlı layihə həyata keçiriləcək.