Beyin dumanı gündəlik və peşəkar həyata mənfi təsir göstərə bilər. Beyin dumanı müəyyən xəstəliklərdən sonra inkişaf edə bilər, lakin stress və zehni yüklənmə nəticəsində də özünü göstərə bilər. Beləliklə, beyin dumanının əlamətləri hansılardır? Özünüzü beyin dumanından qorumaq üçün nələrə diqqət etməlisiniz?
Beyin dumanı gündəlik və peşəkar həyatı təhdid edir.
Ucnoqta.az xəbər verir ki, nevroloq Prof.Dr.Talip Asil sıx iş qrafiki, stress və sağlamlıq problemlərindən qaynaqlanan beyin dumanının gündəlik həyata və iş məhsuldarlığına mənfi təsir göstərə biləcəyini deyir.
Mütəxəssis beyin dumanının tibbi bir vəziyyət olmasa da, diqqəti toplamaqda çətinlik, unutqanlıq və zehni yavaşlama kimi koqnitiv əlamətlərlə özünü büruzə verdiyini açıqlayır. Asil qeyd edib ki, beyin dumanı menopoz, perimenopoz, uzun COVID-19 və lupus kimi otoimmün xəstəliklər, həmçinin güclü stress və zehni gərginlik səbəbindən baş verə bilər.
"Bu vəziyyət şəxsi çatışmazlıq deyil, beynin yorğun və ya gərgin olduğunu göstərən müvəqqəti bir prosesdir. Beyin dumanını azaltmaq üçün tətbiq oluna biləcək üsullar var. İlk növbədə insan özünə qarşı mehriban olmalı və bu vəziyyəti təbii qəbul etməlidir. Gündəlik iş rejiminin qurulması qərar yorğunluğunu azaldır.
Fəaliyyətlər arasında qısa fasilələr vermək zehnin bərpasına kömək edir. Təqvim və rəqəmsal xatırlatmalardan istifadə də zehni qarışıqlığın qarşısını alır."
Hər gecə 7-9 saat arasında yatmağın yaddaşı və diqqəti gücləndirdiyini vurğulayan Asil, zehni aydınlıq üçün kifayət qədər maye qəbulunun da vacib olduğunu qeyd etdi. Müntəzəm fiziki fəaliyyətin beyinə oksigen və qan axını artırdığını ifadə edən Asil, "Yumurta, balıq, qoz-fındıq kimi kolinlə zəngin qidalara üstünlük verilməlidir. Xroniki stressdən qaçınılmalıdır. Beyin dumanı uzun müddət davam edərsə və ya gündəlik həyatı əhəmiyyətli dərəcədə təsir edərsə, həkimə müraciət edilməlidir" dedi.