WhatsApp süni intellektdən istifadə edərək stikerlər yarada biləcək
“WhatsApp” messenceri stikerlər kitabxanasını genişləndirəcək və süni intellektdən (AI) istifadə edərək stikerlər yaratmaq mümkün olacaq.
Ucnoqta.az xəbər verir ki, xidmətin nümayəndələri rəsmi bloqda yeni funksiyaların işə salındığını elan ediblər.
“İnsanlar özlərini ifadə etmək və söhbətlərinə şəxsiyyət və əyləncə əlavə etmək üçün stikerlərdən istifadə etməyi sevirlər. Bəzən stikerlər emosiya və əhval-ruhiyyəni sözlərdən daha yaxşı çatdıra bilir və bu gün biz stikerləri fərdiləşdirmək üçün yeni üsullar əlavə edirik”.
Qeyd olunur ki, “WhatsApp” onlayn animasiyalı GIF bazası Giphy ilə əməkdaşlığa başlayıb ki, bu da proqramda stiker kolleksiyasını genişləndirməyə kömək edəcək. Bu stikerlərə daxil olmaq üçün siz söhbətdəki stiker işarəsini vurmalı və axtarış çubuğuna mətn sorğusu və ya emoji daxil etməlisiniz.
Xidmətin nümayəndələri onu da bildiriblər ki, stikerlər yaradaraq messencerdə paylaşmağa imkan verən Custom Sticker Maker tətbiqi bundan sonra təkcə iOS deyil, həm də Android-də işləyən qurğu sahibləri üçün əlçatan olacaq. Bundan əlavə, istifadəçilər lazımsız stikerləri silə və tez-tez istifadə etdiklərini siyahının yuxarısına daşıya biləcəklər.
Bundan əlavə, məlum olub ki, WhatsApp-da süni intellektdən istifadə edərək stikerlər yaratmaq funksiyası olacaq. Hələlik yenilik ABŞ-da yalnız iPhone və Android smartfonlarında mövcuddur.
Yeni funksiyaların bütün messencer istifadəçiləri üçün nə vaxt əlçatan olacağı açıqlanmır.
Daha əvvəl bildirilmişdi ki, “WhatsApp” mesaja iki dəfə toxunmaqla reaksiya göndərmək imkanı əldə edəcək. WABetaInfo portalının ekspertləri qeyd ediblər ki, funksiya vaxta qənaət edəcək və ünsiyyəti yaxşılaşdıracaq.///lenta