Bu ilin üç rübü ərzində Bakı-Tbilisi-Ceyhan (BTC) üzrə əməliyyat xərclərinə təqribən 87 mln. dollar, əsaslı xərclərə isə təqribən 21 mln. dollar xərclənib.
“Report”un “BP-Azerbaijan” şirkətinin hesabatına istinadən verdiyi məlumata görə, BTC üzrə əməliyyat xərcləri ötən ilin üç rübü ilə müqayisədə 14 mln. dollar və ya 13,86% azalıb. Bu müddət ərzində əsaslı xərclər isə 2 mln. dollar və ya 10,53% artıb.
Bu ilin üç rübü ərzində isə BTC vasitəsilə 25 mln. tondan çox (təqribən 189 mln. barel) xam neft ixrac olunub və bu neft Ceyhanda 243 tankerə yüklənib. Bu, 2017-ci ilin üç rübü ilə müqayisədə 1 mln. ton və ya 3,85% azadır.
1768 km uzunluğunda olan BTC boru kəməri 2006-cı ilin iyun ayında istismara veriləndən 2018-ci ilin 3-cü rübünün sonunadək bu boru kəməri vasitəsilə ümümilikdə 408 mln. tondan artıq (3,1 mlrd. bareldən artıq) xam neft nəql edilib və Ceyhanda 4001 tankerə yüklənərək dünya bazarlarına göndərilib.
Hazırda BTC boru kəməri əsasən Azərbaycandan “Azəri-Çıraq-Günəşli” (AÇG) yataqlar blokunun nefti və “Şahdəniz” kondensatı daşıyır. Bundan əlavə, BTC vasitəsilə digər xam neft və kondensat həcmləri də, o cümlədən Türkmənistan, Rusiya və Qazaxıstan nefti nəql olunur.
Qeyd edək ki, "BTC Co."nun səhmdarları rolunda BP (30,10%), "AzBTC" (25,00%), "Chevron" (8,90%), "Equinor” (8,71%), TPAO (6,53%), "Eni" (5,00%), "Total" (5,00%), "Itochu" (3,40%), "Inpex" (2,50%), “ExxonMobil” (2,50%) və "ONGC (BTC) Ltd."(2,36%) şirkətləri çıxış edir.