Rusiya İstintaq Komitəsi Xabarovskda idmançını qətlə yetirən azərbaycanlı MMA döyüşçüsü Anar Allahverənovun tutulması ilə bağlı məlumatı təkzib edir. Ucnoqta.az virtualaz.org-a istinadən xəbər verir ki, Komitədən verilən açıqlamada pauerliftinq üzrə dünya çempionatının gümüş medalçısı, Andrey Draçovun ölümündə şübhəli bilinən şəxs saxlanılmayıb, amma onun axtarışı davam etdirilir. “KİV və sosial şəbəkələrdə pauerliftinq üzrə dünya ikincisinin öldürülməsində şübhəli binin şəxsin saxlanılması ilə bağlı qeyri-dəqiq məlumatlar yayılıb. Həmin şəxs tutulmayıb, axtarışdadır, hazırda hüquq-mühafizə orqanları onun saxlanılması ilə bağlı geniş miqyaslı axtarış tədbirləri həyata keçirir”, - Rusiya İstintaq Komitəsinin məlumatında deyilir. Məlumatda həmçinin bildirilir ki, təhqiqatçılar şübhəli şəxsin ola biləcəyi ehtimal olunan yerlərdə 4 axtarış keçiriblər. Xatırladaq ki, bir qədər əvvəl “Qovorit Moskva” radiostansiyası 2011-ci il pauerliftinq üzrə dünya çempionatının 120 kq dərəcəsində gümüş medalçısı, rusiyalı Andrey Draçovu dünən Xabarovsk şəhərində döyərək ölümünə səbəb olmuş azərbaycanlı MMA döyüşçüsü Anar Allahverənov saxlanılması ilə bağlı məlumat yayılmışdı.