Yanvarın 4-də Qax Kukla Teatrında xeyriyyə məqsədli Yeni İl şənliyi və teatr tamaşası təşkil olunub. Əslən Qax rayonundan olan hüquq müdafiəçisi Əhməd Şahidovun təşəbbüsü ilə keçirilən xeyriyyə tamaşasında Qaxda yaşayan aztəminatlı ailələrin uşaqları üçün “Zınqırovlu pişik” əsəri nümayiş etdirilib. Uşaqlar qarşısında çıxış edən hüquq müdafiəçisi Əhməd Şahidov Dünya Azərbaycanlılarının Həmrəylik Günü və Yeni İl münasibətilə uşaqları və onların valideynlərini, habelə müəlllim və tərbiyəçiləri təbrik edib, gələcək həyatlarında onlara uğurlar arzulayıb.
Qeyd edək ki, Əhməd Orucun müəllifi olduğu “Zınqırovlu pişik” tamaşasının quruluşçu rejissoru Elşad Rəhimzadə, quruluşçu rəssamı isə Mais Abdullayevdir. Tamaşada Qax Kukla Teatrının aktyorları Araz Mehrablı, Afət Yaqubova, Azər Kərimov, Aynurə Abbasova və Nuru Mustafayev iştirak ediblər.
Xeyriyyə konserti zamanı Şaxta Baba və Qar Qız uşaqlara əyləncəli nömrələr göstərib, viktorina xarakterli oyunlar keçirilib.
