“Təəssüratların inanılmazdı, təkrarolunmazdı. Çox sevinirik. Millətimizi, xalqımızı, idman ictimaiyyətini, cənab prezidentimiz İlham Əliyevi təbrik edirəm. Onun böyük qayğısı nəticəsində idmançılar böyük stimul alır, irəliləyirlər”. Bunu apasport.az saytına müsahibəsində Rio-2016-da Azərbaycan yığmasına gümüş medal qazandıran cüdoçu Elmar Qasımovun atası İlqar Qasımov deyib.
Oğlunun qələbəsini şərh edən İlqar Qasımov bildirib ki, Elmar Rioya məhz medal ardınca yollanmışdı: “Gedəndə qızıl medal qazanacağına söz vermişdi. Deyirdi ki, ən azı mükafat qazanacaq. Buna çox inanırdı. Bilirdi ki, onun səviyyəsində olan bir idmançı qızıl qazanmalı idi. Həmin cüdoçu da özü olmaq istəyirdi. Təlim-məşq toplanışını da yüksək səviyyədə keçirmişdi, çox yaxşı formada idi. İkinci yer də superdi”.
Elmarın döyüşlərini ailəsi və qohumları ilə birgə izlədiyini deyən İlqar bəyin sözlərinə görə, oğlunun ilk görüşündə daha çox həyəcan keçirib: “Birinci görüşü daha həyəcanlı idi. Çünki Avropa, dünya və Olimpiya çempionu olan rusiyalı Taqir Xaybillayevlə qarşılaşırdı. Döyüş çox çətin keçdi. Fiziki və psixoloji cəhətdən ağır qarşılaşma alındı. İdmançılar gözəl bilir ki, həmişə ilk döyüş çətin keçir. Amma ardınca adaptasiya gedir. Oğlumda da belə oldu”.
Cüdoçumuz çempionluğu son saniyələrdə əldən verib. Elmar Ermənistanda Avropa birinciliyinin həlledici görüşündə məğlub etdiyi çexiyalı Lukas Krpalekə ipponla uduzub. İlqar Qasımov bildirib ki, məğlubiyyətə onun hər bir döyüşə bütün gücünü qoyması səbəb olub: “Onunla sosial şəbəkədə yazışdıq. Dedi ki, ukraynalı Artyom Bloşenko yarımfinal qarşılaşmasında həddindən artıq güc sərf elədi və finala tam bərpa ola bilmədi. Hər görüşdə çox güc sərf edirdi. Deyirdi ki, gücümü qorusam uduza bilərəm. Lakin mənə növbəti mərhələyə çıxmaq lazımdı. Ona görə gücünü qorumurdu. Halbuki, həmin rəqibi Ermənistanda 17 saniyəyə məğlub etmişdi”.
Oğlunun gümüş medal qazanmasına sevinən ata bildirib ki, buna çox sevinsə də, çempion olmamasına da üzülüb: “Qızıl medal qazansaydı, çox sevinərdik. Əslində, Olimpiadada hər mükafatın özü böyük uğurdu. Cudonun yaradıcılarından olan Yaponiyanın bu çəkidəki təmsilçisi Ryunosuke Haqa üçüncü pillədə qərarlaşdı. Lakin o sevincindən fəxri kürsüdə göz yaşlarını saxlaya bilmədi. Dünyanın ən güclülərindən olan fransalı Siril Mare də “bürünc”ə sevinirdi. Biz isə finalda uduzmasına üzüldük. Könül istərdi ki, Azərbaycanın himnini səsləndirsin, amma qismət olmadı. Buna baxmayaraq, ikinci yer də superdi. İnşallah, növbəti yarışda bunu bacarar”.