Azərbaycan məhsullarının ixrac coğrafiyası genişlənir

Bakı Biznes Mərkəzində Azərbaycanda İxracın və İnvestisiyaların Təşviqi Fondunun (AZPROMO) fəaliyyətinə, “Made in Azerbaijan” brendinin təşviqi istiqamətində görülən işlərə və qarşıda duran vəzifələrə dair mətbuat konfransı keçirilib.

Ucnoqta.az xəbər verir ki, İqtisadiyyat nazirinin müavini Rüfət Məmmədov Azərbaycan Respublikası Prezidentinin rəhbərliyi ilə qeyri-neft sektorunun inkişafı istiqamətində həyata keçirilən islahatlar, yerli istehsalın stimullaşdırılması, rəqabətədavamlı, ixracyönümlü qeyri-neft məhsullarının istehsalı, ixracın strukturunun şaxələndirilməsi, istehsalda və ixracda özəl sektorun payının artırılması məqsədi ilə görülən işlər barədə məlumat verib.

Bildirilb ki, həyata keçirilən tədbirlərin nəticəsi olaraq, qeyri-neft sektorunda ixrac 2017-2018-ci illərdə 36,5%, 2019-cu ilin 5 ayı ərzində isə 17,8% artıb. Bu ilin ötən dövründə kənd təsərrüfatı və emalı məhsullarının ixracı 37,6% artıb. Qeyri-neft sənaye məhsulları ixracının artığını qeyd edən nazir müavini bu sahədə digər mexanizmlərlə yanaşı, sənaye parklarının rolunu da qeyd edib və burada istehsal olunmuş 1,4 milyard manata yaxın məhsulun 267 milyon manatlıq hissəsinin ixrac olunduğunu bildirib. Azərbaycanın ixrac məhsullarının çeşidlərinin artdığını vurğulayan nazir müavini Rüfət Məmmədov Azərbaycandan 2166 adda məhsulun xarici bazarlara çıxarıldığını diqqətə çatdırıb. Bununla yanaşı, xarici iqtisadi fəaliyyət iştirakçılarının sayı da artır. Belə ki, bu ilin 5 ayı ərzində xarici ticarət fəaliyyəti ilə məşğul olan sahibkarların sayı 74% artaraq 18,4 minə çatıb.

Rüfət Məmmədov qeyd edib ki, Azərbaycan məhsullarının ixrac coğrafiyasının genişləndirilməsi məqsədilə intensiv tədbirlər həyata keçirilir, xarici ölkələrə ardıcıl olaraq ixrac missiyaları təşkil edilir, nüfuzlu beynəlxalq sərgilərdə Azərbaycan şirkətlərinin iştirakı təmin olunur. Qeyri-neft ixracının stimullaşdırılması, “Made in Azerbaijan” brendinin təşviqi məqsədilə indiyədək xarici ölkələrə 29 ixrac missiyası təşkil edilib. Azərbaycan məhsulları indiyədək 24 beynəlxalq sərgidə nümayiş olunub. Bu tədbirlər çərçivəsində Azərbaycan məhsullarının ixracına dair razılaşmalar əldə edilib, müqavilələr imzalanıb.

Bundan başqa, “Made in Azerbaijan” brendinin təşviqi məqsədilə xarici ölkələrdə Azərbaycan ticarət və şərab evləri yaradılır. Belə ki, 2017-ci ildə Belarusda, 2018-ci ildə Ukrayna, Latviya, Polşa və Çində, bu ilin yanvar ayında isə Birləşmiş Ərəb Əmirliklərinin Dubay şəhərində Azərbaycan ticarət evləri açılıb. Bu ticarət evlərinin hər birində müxtəlif növ Azərbaycan məhsullarının daimi sərgisi, Çinin Urumçi və Şanxay şəhərlərində Azərbaycan şərab evləri fəaliyyət göstərir. Bu şəbəkənin genişləndirilməsi istiqamətində tədbirlər davam etdirilir. Bu ilin sonunadək Qazaxıstanın Nur-Sultan şəhərində ticarət evinin, Rusiyada və Çində şərab evlərinin açılması nəzərdə tutulur. 

Eyni zamanda, Rusiya Federasiyası, Çin Xalq Respublikası, Birləşmiş Ərəb Əmirlikləri və Mərkəzi Avropa ölkələri üzrə Azərbaycanın ticarət nümayəndələri fəaliyyət göstərir ki, bu mexanizmlər Azərbaycanın xarici ölkələrdəki ticarət nümayəndələri ölkəmizin iqtisadi maraqlarının təmin olunmasında, xarici investorların cəlb edilməsində, potensial alıcılarla əlaqələrin qurulmasında mühüm rol oynayır.

Hazırda Rusiyada “Azərbaycan nemətləri” mağazalar şəbəkəsinin yaradılması layihəsi həyata keçirilir. Layihə çərçivəsində ilk mağaza bu ilin martında Moskvada açılıb. Rusiyanın digər şəhərlərində də bu cür mağazaların açılması planlaşdırılır.

İxracla bağlı geri ödəmə mexanizminin tətbiq olunması da qeyri-neft məhsullarının ixracının stimullaşdırılmasında mühüm rol oynayır. Bildirilib ki,  sahibkarlara 2019-cu ilin ötən dövrü ərzində bu mexanizm çərçivəsində 5 mln. manatdan çox ixrac təşviqi, indiyədək isə 13 mln. manatdan artıq ixrac təşviqi ödənilib.

AZPROMO-nun rəhbəıri vəzifəsinin icra edən Yusif Abdullayev  Azərbaycan məhsullarının xarici bazarlarda tanıdılması və satışının artırılması, "Made in Azerbaijan" brendinin təşviqi istiqamətində AZPROMO tərəfindən görülən işlər və nəzərdə tutulan tədbirlər barədə məlumat verib. Qeyd edilib ki, 2019-cu ilin əvvəlindən Azərbaycan məhsulları 7 beynəlxalq sərgidə “Made in Azerbaijan” vahid ölkə stendi ilə nümayiş olunub. Bunlar Almaniyanın Berlin şəhərində “Beynəlxalq Yaşıl Həftə 2019”, “Fruit Logistica 2019”, “Prowein 2019”,  Rusiyanın Moskva şəhərində “Prodexpo 2019”, “Mosbuild 2019”, BƏƏ-də “Gulfood 2019” və Çində təşkil edilmiş  “Sial China 2019” beynəlxalq sərgiləridir. Diqqətə çatdırılıb ki, həyata keçirilən tədbirlərin davamı olaraq Azərbaycan şirkətləri bu ilin sonunadək Rusiyada “Worldfood Moscow”, Almaniyada “Anuga 2019” və  Çində təşkil olunacaq  “Food and Hotel China” beynəlxalq sərgilərində iştirak edəcəklər.

Məlumat verilib ki, bu il 4 xarici ölkəyə 5 ixrac missiyası təşkil olunub. Belə ki, cari ilin ilk aylarında  Azərbaycan ixrac missiyası Çin, Polşa, Latviya və Qətərdə olub. 2019-cu ilin iyun və iyul aylarında isə İsveçrənin Surix və Bern şəhərlərinə və Rusiyanın Yekaterinburq şəhərinə ixrac missiyası təşkil olunacaq.

Tədbirdə ixracın genişləndirilməsi istiqamətində həyata keçirilən kompleks stimullaşdırıcı tədbirlər barədə məlumat verilib, jurnalistlərin sualları cavablandırılıb.

Emin

Tarix
19 İyun 2019 [17:00]
Müəllif
Üç nöqtə
Digər xəbərlər
2019-06-19 17:00:07
Xəbər xətti
Foto
Video
Çox oxunanlar
Sorğu
Yayda istirahətə harada üstünlük verirsiz?
 Azərbaycanda
 Xarici ölkədə
 İstirahət etmirəm
KİV
Virtual Qarabağ

Ən son xəbərləri səhifəmizdən də izləyin