Xırdalandakı qəzada həlak olan sürücü maşını qaçırıbmış
DİN Baş Dövlət Yol Polisi İdarəsi Xırdalan şəhəri ərazisində yol polisi tərəfindən təqib olunduğu deyilən, sürücünün ölümü, sərnişinin isə xəsarət alması ilə nəticələnən qəza ilə bağlı açıqlama verib. Baş İdarənin şöbə rəisi, polis polkovniki Kamran Əliyev Avtosfer.az-a bildirib ki, mayın 28-də, saat 15:00 radələrində Xırdalan şəhəri ərazisində aşmış “VAZ-2106” markalı, 90-EH-176 dövlət qeydiyyat nişanlı minik avtomobili onu idarə etmiş və qəza nəticəsində həlak olmuş Məmmədov Sahil Əfsər oğlu tərəfindən qaçırılıbmış. Bununla bağlı həmin avtomobili təmirə vermiş sahibi Məmmədov Emil Rəsul oğlu həmin gün Nizami rayon Polis İdarəsinin 24-cü polis bölməsinə məlumat verib: “Lakin avtomobilin aşmasına səbəb heç də patrul avtomobili tərəfindən təqib edilməsi olmayıb. Müşahidə kameralarının görüntülərinə əsasən həqiqətən də Bakı-Quba yolunda paytaxt istiqamətinə xeyli aralı məsafədə patrul avtomobili hərəkət edib. Ancaq qarşıda gedən “VAZ-2106” markalı avtomobil Bakı-Quba yolundan Xırdalan istiqamətinə döndüyü üçün arxadan düzünə Bakı şəhərinə doğru hərəkət edən YPX əməkdaşları onun aşmasını görməyiblər. Bu haqda patrul avtomobilinin arxasınca gələn digər nəqliyyat vasitəsinin sürücüsü onlara işarə verərək saxlatdırıb və məlumat verib. Geri dönərək qəza yerinə ilk çatan, xəsarət alanlara kömək edən, təcili yardım çağıran da məhz həmin əməkdaşlar olub. Araşdırma zamanı müəyyən edilib ki, qəzada həlak olmuş Məmmədov Sahil Əfsər oğlu Nizami rayonu B.Çobanzadə küçəsində yerləşən avtomobil təmiri sexində usta işləyib. Həmin avtomobili də sahibindən xəbərsiz götürüb sürücülük hüququ olmadan idarə edərək Saray qəsəbəsinə gedib və geri qayıdarkən qəza törədib”.
Ehtimal olunur ki, avtomobili sürücülük hüququ olmadan və icazəsiz idarə etdiyinə görə yaxalanmaq qorxusu olan S.Məmmədov arxada hərəkət edən edən patrul avtomobilinin görünüş dairəsindən mümkün qədər tez uzaqlaşmaq niyyəti ilə istiqamətini dəyişib və sürət həddini yol şəraitinə uyğun seçmədiyi üçün bir qədər sonra Xırdalan yolunda avtomobili aşırıb.
Qeyd edək ki, qəza nəticəsində ölən Sahil Məmmədov 1 ay öncə ailə qurubmuş. O, evin tək övladı olub.
Elməddin