ABŞ Tehranla nüvə məsələsinin sülh yolu ilə həllinə sadiqdir, lakin diplomatik səylər İranın nüvə silahı əldə etməsinin qarşısını almaq kimi əsas məqsədə çatmaqda uğursuz olarsa, hərbi güc tətbiq etməyə hazırdır.
Ucnoqta.az xəbər verir ki, ABŞ-nin vitse-prezidenti Cey Di Vens bunu Fox News-a verdiyi müsahibədə bildirib.
"Nəticə etibarilə, prezident İranın nüvə silahına sahib olmamasını necə təmin edəcəyinə qərar verəcək, amma hazırda biz iranlılarla diplomatik danışıqların növbəti mərhələsindəyik və ağlabatan bir razılığa gəlməyə çalışırıq. İran nüvə silahına sahib ola bilməz.
Düşünürəm ki, Ali Lider və onun sistemindəki hər kəs bunu başa düşməlidir. Biz çox aydın şəkildə danışmışıq və ümid edirik ki, ordu olmadan yaxşı bir həll yoluna çata bilərik, amma ordudan istifadə etməli olsaq, prezidentin mütləq bu səlahiyyəti var", - Vens deyib.