ABŞ Prezidenti Donald Trampın adanın ABŞ tərəfindən ilhaq edilməsi ilə bağlı açıqlamaları fonunda Avropa ölkələrindən ilk hərbi qulluqçular Qrenlandiyaya gəlib.
Ucnoqta.az xəbər verir ki, bu barədə Bild qəzeti yerdəki müxbirlərə istinadən məlumat yayıb.
Qəzetin məlumatına görə, dünən gecə Qrenlandiyanın paytaxtı Nuukdakı hava limanına Danimarka Ordusunun Hercules hərbi nəqliyyat təyyarəsi eniş edib. Təyyarədə təkcə Danimarka hərbi qulluqçuları deyil, həm də Fransa Silahlı Qüvvələrinin nümayəndələri olub.
Demək olar ki, eyni vaxtda adanın qərbindəki Kangerlussuaq aerodromuna başqa bir Danimarka Hercules təyyarəsi eniş edib.
Cümə axşamı səhəri Nuuka ilk 13 Bundesver şəxsi heyətinin gəlməsi gözlənilir. Almaniyadan əlavə, Birləşmiş Krallıq, Kanada, Hollandiya, Norveç və İsveç də yerləşdirmə missiyasında iştirak edəcək.