“Azərbaycan Milli Elmlər Akademiyasının Nizamnaməsinə əsasən, Ümumi yığıncağımız bu il aprel ayının sonunda keçiriləcək”.
Bunu APA-ya açıqlamasında AMEA-nın vitse-prezidenti Rasim Əliquliyev deyib.
O qeyd edib ki, ildə bir dəfə AMEA-nın Ümumi yığıncağı keçirilir: “AMEA-nın bu gün keçirilən Ümumi yığıncağında belə qərar qəbul olundu ki, növbəti yığıncağa qədər AMEA-nın prezidenti səlahiyyətlərinin icrası birinci vitse-prezident Arif Həşimova həvalə olunsun. Əgər hansısa fövqəladə, növbədənkənar hal olmasa, Ümumi yığıncaq aprelin sonunda keçiriləcək. AMEA-nın növbədənkənar Ümumi yığıncağının keçirilməsi ilə bağlı da hazırda elə bir iradə yoxdur. Adi qaydada işimiz davam edəcəksə, aprel ayının sonunda Ümumi yığıncaq keçiriləcək”.
Xatırladaq ki, AMEA-nın bu gün keçirilən Ümumi yığıncağında Ramiz Mehdiyevin Akademiyanın prezidenti vəzifəsindən istefası barədə ərizəsi qəbul edilib, bu vəzifənin icrası birinci vitse-prezident Arif Həşimova həvalə olunub.