“Sumqayıt Texnologiyalar Parkı” MMC beynəlxalq əlaqələrini genişləndirməkdə davam etdirir. Müəssisə Ukraynanın “Xarkov Elektrotyajmaş” şirkəti ilə mühəndislik və sənaye sahələrində birgə əməkdaşlıq haqqında müqavilə imzalayıb.
STP mətbuat xidmətindən Ucnoqta.az-a verilən məlumata görə, “Sumqayıt Texnologiyalar Parkı” MMC tərəfdən baş direktor Emin Məmmədov və “Xarkov Elektrotyajmaş” zavodunun direktor müavini Dmitriy Kostyukun imzaladığı müqavilənin şərtlərinə əsasən, tərəflər gələcəkdə hər iki ölkənin sənaye sahələrinin inkişaf səviyyəsinin artırılması, yeni texnologiyaların yaradılması istiqamətində səylərini birləşdirəcəkdir.
Razılaşmanın şərtlərinə əsasən, gələcəkdə hər iki müəssisə təcrübəli kadrların hazırlanmasında, mütəxəssislərin qarşılıqlı mübadiləsi işində əməkdaşlıq edəcəklər. Ukrayna şirkəti bir çox məhsulun istehsalında xammal, yarımfabrikat və ehtiyat hissələrin təchizatı ilə STP-yə köməklik göstərəcək.
Qeyd edək ki, 2009-cu il dekabr ayının 22-də cənab prezident İlham Əliyev tərəfindən istismara verilən Sumqayıt Texnologiyalar Parkı regionda texnoparkların yaradılmasında pioner olmaqla, müxtəlif istehsalat sahələri üzrə ixtisaslaşmış nəhəng zavodlar kompleksidir. 2017-ci ildə Sumqayıt Kimya Sənaye Parkının rezidenti statustu alıb. Regionda nadir layihə olan STP daxili bazarın tələbatını tam ödəməklə bərabər, həm də xarici bazara kifayət qədər məhsullar ixrac etmək qabiliyyətinə qadirdir. Texnoparkın bütün zavodları Avropa istehsalı olan labaratoriyalarla təmin olunub və AZS ISO/IEC 17025-2009 standardlarına uyğun akkreditə olunub, istehsal olunmuş bütün məhsulların müvafiq sertifikatları var. STP-də ISO 9001 və OHSAS 18001 beynəlxalq standardları da tədbiq olunur.