“WhatsApp” “Apple” kompüterləri üçün yeni qrup zəngləri proqramını istifadəyə verib
Ucnoqta.az xəbər verir ki, bu barədə mesaj messencerin tərtibatçılarının bloqunda yer alıb. MacOS-a əsaslanan Apple kompüterləri üçün qrup zənglərini dəstəkləyən yeni "WhatsApp" proqramı buraxılıb.
Qeyd olunur ki, macOS üçün yeni "WhatsApp" tətbiqi bu ilin əvvəlində buraxılmış Windows versiyasına bənzəyir. Yeni messencer müştərisi sayəsində artıq ilk dəfə olaraq qrup video və audio zəngləri Apple istifadəçiləri üçün əlçatandır. Video zənglərdə 8 nəfərə qədər, audio zənglərdə isə 32 nəfərə qədər iştirak edə bilər.
İstifadəçilər həmçinin zəngə başladıqdan sonra qrup zənglərinə qoşula, zəng tarixçəsinə baxa və hətta proqram bağlı olduqda belə daxil olan zəng bildirişlərini ala biləcəklər.
Tərtibatçılar, həmçinin, proqramın macOS istifadəçilərinə daha tanış görünməsi üçün onun dizaynını yeniləyiblər. Digər xüsusiyyətlərə faylı sadəcə həmsöhbətlə söhbətə sürükləməklə göndərmək imkanı və daha ətraflı söhbət tarixçəsinə baxmaq funksiyası daxildir.
“Apple” kompüterləri üçün yeni “WhatsApp” proqramı hazırda messencerin saytında yükləmək üçün əlçatandır və tezliklə “App Store”da görünəcək.