Samuxda hündür mərtəbəli binalardan ibarət yeni Samux şəhərinin salınması nəzərdə tutulur. Bu barədə məlumatı Samux rayonunun baş memarı Əsgər Həsənov verib. Onun sözlərinə görə, Samux rayonun yeni baş planı təsdiq olunub və buna əsasən yaxın 20 il ərzində rayonun Gəncə ilə sərhəd hissəsində olan boş torpaqlarda yeni şəhərə salınacaq. “Hazırda Samux şəhərinin sahəsi 513,7 hektardır. Yeni şəhərin ərazisi ilə birgə bu sahə 863,9 hektara kimi artacaq. Yeni Samux şəhəri müasir şəhərsalma qaydaları əsasında tikiləcək. Yeni yaşayış massivində bir sıra yeni iş yerləri və sosial obyektlər də inşa olunacaq”.
Ə.Həsənov qeyd edib ki, yeni Samux şəhərində hündür mərtəbəli binalar, yəni şəhərə xas olan 12,14 və 16 mərtəbəli yaşayış evləri ucaldılacaq. Müsahib həmçinin bildirdi ki, rayonun sərhədləri və baş plan artıq təsdiq olunub və ona dəyişiklik edilməyəcək.

Əfsun