İldırım Məmmədov: “Bordyujanın bəyanatını Azərebaycana mesaj kimi qiymətləndirmək lazımdır”

 Rəsmi Bakı hər dəfə müharibə bəyanatı ilə çıxış etdiyi zaman Rusiyadan analoji bəyanatlar səslənir. Son zamanlar Azərbaycanın müharibə bəyanatları səngisə də müdafiə naziri Səfər Əbiyevin komandanlığı altında genişmiqyası hərbi əməliyyatların keçirilməsi Rusiyanın Kollektiv Təhlükəsizlik Müqaviləsi Təşkilatının (KTMT) dili ilə müvafiq bəyanatı verməsinə səbəb olub.
N.Bordyujanın açıqlamasını “Üç nöqtə”yə şərh edən hərbi ekspert İldırım Məmmədov deyir ki, sadəcə olaraq Azərbaycanın ən yeni tarixinə fikir verib, görməliyik ki, ölkəmizə qarşı edilən bütün pisliklərin müəllifi hörmətli Bordyujanın vətəni Rusiya Federasiyası olub: “Dağlıq Qarabağ münaqişəsinin yaranmasının da, əvvəllər istismar olunmağımızın da, belə yaşamağımızın da hamısı Rusiyanın adı ilə bağlıdır. Bütün bunlar da ondan irəli gəlir ki, Rusiyanın regionda iki müttəfiqi var. Bunlardan biri vassal olan Ermənistandır, digəri isə İrandır ki, bu açıqlamalar da İrana ona biləcək olayların tərkib hissəsi ilə bağlıdır. Ona görə də Bordyuja bu açıqlamasını Ermənistan hərbi təlimlər keçdiyi zaman bu sözləri desəydi, onu başa düşmək olardı, ancaq Ermənistan təlim keçəndə heç bir söz demirlər, özlərini elə aparırlar ki, guya bu belə də olmalıdır, guya “yazıq” Ermənistan pis vəziyyətdə qalıb. Lakin Azərbaycan genişmiqyaslı təlimlər keçirən kimi başlayırlar narahatçılıq nümayiş etdirməyə. Bu, Azərbaycanda hər şeyi müharibə yolu ilə həll etməyə çalışan qüvvələri sakitləşdirmək üçün verilmiş bəyanatdır ki, bunu da Azərebaycanın hərbi-siyasi rəhbərliyinə verilmiş mesaj kimi qiymətləndirmək lazımdır”.
Ermənistanın Dağlıq Qarabağı müstəqil dövlət kimi tanımamasına baxmayaraq hərbi doktrinasında 12 dəfə Dağlıq Qarabağın adının çəkildiyini deyən İ.Məmmədov əlavə etdi ki, Rusiyanın tez bir zamanda Ermənistana yardım etməsi alınmayacaq. Hərbi ekspert hesab edir ki, Rusiyanın Ermənistanla əlaqəsi yalnız İran ərazisindəndir: “Mən hesab edirəm ki, Azərbaycan genişmiqyaslı hərbi əməliyyatlara başlayacaqsa, Gürcüstan da hava sərhəddini ruslar üçün bağlayacaq. Qalır dəniz-İranm ərazisi, hava-İran ərazisi və Ermənistanla əlaqə yaradacaq. Bu barədə bir müdət əvvəl Bordyujanın özü demişdi ki, bu yolu hələ 1990-cı illərdə salmışıq və Ermənistana İran ərazisindən kömək olacaq. Bu baxımdan Rusiya Ermənistan tərəfindən hərbi əməliyyatlarda iştirak edə bilər. Lakin o da ola bilər ki, Azərbaycan Rusiyanı birbaşa danışıqlar, Türkiyənin, ABŞ-ın, NATO-da olan tərəfdaşlarımızın, bizdən neft alan İngiltərənin, Fransanın vasitəsi ilə neytrallaşdıra bilər”.
İ.Məmmədov deyir ki, Rusiya hansısa formada birbaşa hərbi doktrinasında nəzərdə tutulmuş Ermənistana dəstəyi başqalarına – Azərbaycana qarşı həyata keçirəcəyini hesab etmir: “Məsələ burasındadır ki, Rusiyanın özünün Ermənistanda kifayət qədər gücü, bazası var. 102-ci hərbi baza gücləndirilmiş rejimdədir, Gürcüstandan çıxarılmış hərbi texnikaların hamısı Ermənistanın ərazisində yerləşdirilib və Ermənistanın hava və quru sərhədlərinin hamısının müdafiəsi Rusiya tərəfindən həyata keçirilir. Bu səbəbdən də onlar hesab edirlər ki, Rusiyanın Ermənistandakı gücü Azərbaycanın istənilən təhdidinə cavab vermək üçün kifayət qədərir. Digər tərəfdən dünya keçmiş əsrin əvvəllərində olan dünya deyil. Rusiyanın özü də qorxu içindədir. Çünki böyükmiqyaslı müharibə Rusiyanın nə hərbisinin, nə iqtisadiyyatının, nə də hərbi-siyasi rəhbərliyinin xeyrinə deyil. Bununla belə düşünürəm ki, Azərbaycan hər bir formada anti-terror əməliyyatlarına başlayarsa, bu məsələləri nəzərdə saxlamalıdır”.

Məhərrəm