Qlobal sistemlərin sarsıldığı, köhnə iqtisadi modellərin öz funksionallığını itirdiyi bir dövrdə Azərbaycan yeni inkişaf mərhələsinin astanasındadır. Regionda hərbi-siyasi reallıqları dəyişən ölkə indi qarşısında daha böyük və strateji bir hədəf qoyur: qələbəni dayanıqlı iqtisadi gücə çevirmək. Məhz bu kontekstdə beynəlxalq biznes və strateji investisiyalar sahəsində uzun illər fəaliyyət göstərmiş Güləli Bağırovun təqdim etdiyi “NeoOrdo” konsepsiyası diqqət mərkəzinə düşür.
“NeoOrdo” yalnız bir layihə deyil, bu, yeni idarəetmə fəlsəfəsi, yeni iqtisadi nizam və Azərbaycanın qlobal proseslərdə izləyici yox, qərarverici mövqeyə yüksəlməsi iddiasıdır. Dövlət siyasəti ilə uzlaşan, dövlət büdcəsinə yük salmayan və insanı mərkəzə alan bu model minlərlə yeni iş yeri, sosial rifah və uzunmüddətli sabitlik vəd edir.
Jurnalist Xəyal Abdullayevin Güləli Bağırovla apardığı müsahibə “NeoOrdo”nun mahiyyətini, məqsədlərini və ən əsası, bu layihənin adi Azərbaycan vətəndaşının həyatında nəyi dəyişəcəyini aydın şəkildə ortaya qoyur. Bu müsahibə təkcə bir layihənin təqdimatı deyil, Azərbaycanın gələcək inkişaf yoluna dair strateji baxışdır.
Ucnoqta.az həmin müsahibəni təqdim edir:
– Güləli bəy, müsahibəmizə başlamazdan öncə oxucularımız üçün sizi daha yaxından tanıtmaq istərdik. Güləli Bağırov kimdir, hansı yolun və baxışın təmsilçisidir?
– Mən Güləli Bağırovam. Uzun illərdir beynəlxalq biznes, strateji investisiyalar və böyükmiqyaslı inkişaf layihələri üzərində çalışıram. Fəaliyyətim təkcə kommersiya məqsədi daşımayıb, hər zaman davamlı inkişaf, milli maraqlar və uzunmüddətli dövlətçilik baxışı üzərində qurulub. Müxtəlif ölkələrdə qazandığım təcrübə mənə göstərib ki, müasir dünyada güc təkcə resurslarda deyil, düzgün planlama, strateji düşüncə və zamanında atılan addımlardadır.
Əsas hədəfim Azərbaycanı yalnız regionda deyil, qlobal miqyasda söz sahibi olan, qərar verən və istiqamət göstərən bir dövlətə çevirməkdir. Bizim buna həm tarixi haqqımız, həm də intellektual və iqtisadi potensialımız var. NeoOrdo layihəsi də məhz bu baxışın, bu düşüncə tərzinin və bu uzunmüddətli strategiyanın real və konkret nəticəsidir. Bu layihə ilə məqsədim Azərbaycanın imkanlarını dünya miqyasında sistemli şəkildə ortaya qoymaq və ölkəmizi yeni inkişaf mərhələsinə daşımaqdır.
– “NeoOrdo” layihəsi nədir və Azərbaycan üçün nə vəd edir?
– “NeoOrdo” sadəcə bir tikinti və ya şəhər layihəsi deyil. Bu, yeni iqtisadi model, yeni idarəçilik fəlsəfəsi və yeni dünya baxışıdır. Layihə reallaşdıqdan sonra Azərbaycan maliyyə, texnologiya, logistika və innovasiya sahələrində dünyanın əsas mərkəzlərindən birinə çevriləcək.
– Bu layihənin sosial və iqtisadi təsiri necə olacaq?
– Ən vacib məqam budur ki, “NeoOrdo” layihəsi ilə Azərbaycanda işsizlik problemi minimum səviyyəyə enəcək. Minlərlə yeni iş yeri yaradılacaq, gənclər üçün real perspektivlər açılacaq. Bu layihə xalqın rifahını yüksəltmək üçün nəzərdə tutulub.
– Xalqın bu layihəyə dəstəyi nə üçün önəmlidir?
– Azərbaycan xalqı tarix yazmış xalqdır. 44 günlük Vətən müharibəsində xalqımız təkcə torpaqlarını deyil, dünya tarixinin axarını dəyişdi. İndi isə yeni mərhələdəyik. Müharibə meydanında qazanılan qələbəni iqtisadi və sosial rifah qələbəsinə çevirməyin vaxtıdır. “NeoOrdo” bu keçidin adıdır. Bu layihə xalqla birlikdə qurulacaq və xalqın gələcəyinə xidmət edəcək.
– Turizmə faydası nədir?
– 2024-cü ildə dünya üzrə beynəlxalq turist axını təxminən 1 milyard 400 milyon nəfər təşkil edib. Qlobal turizm statistikası göstərir ki, bu turistlərin azı 20 faizi səyahət marşrutunu seçərkən unikal, simvolik və miqyaslı layihələrə üstünlük verir. Bu amil iri və innovativ turizm layihələri üçün son dərəcə yüksək bazar potensialı yaradır. 36 hektar ərazidə, ABŞ-dəkı Disneyland modelindən daha müasir, texnoloji və çoxfunksiyalı bir turizm-əyləncə kompleksinin yaradılması Azərbaycanın qlobal turizm xəritəsində mövqeyini köklü şəkildə gücləndirə bilər.
Belə bir layihə dünya üzrə mövcud turist axınının yalnız məhdud bir hissəsini cəlb etsə belə, ildə təxminən 280 milyon turistin ölkəyə səfər etməsi iqtisadi baxımdan əsaslandırıla bilən ssenari kimi qiymətləndirilə bilər.
Hər bir turistin minimum 1 000 ABŞ dolları həcmində xərcləmə etdiyini nəzərə alsaq, bu rəqəm orta qlobal xərcləmədən aşağı və konservativ hesablamadır, nəticədə Azərbaycan iqtisyyatına illik təxminən 280 milyard ABŞ dolları həcmində birbaşa maliyyə axını təmin oluna bilər.
Bu göstərici təkcə turizm gəlirləri ilə məhdudlaşmır. Layihə eyni zamanda: xidmət sektorunun genişlənməsinə,
minlərlə yeni iş yerinin yaradılmasına,
nəqliyyat və şəhər infrastrukturunun inkişafına,
vergi və qeyri-vergi daxilolmalarının artmasına,
ölkənin beynəlxalq investisiya cəlbediciliyinin yüksəlməsinə xidmət edərək, Azərbaycanın uzunmüddətli iqtisadi dayanıqlığını və regional liderlik mövqeyini gücləndirən strateji platformaya çevrilə bilər.
– Layihə dövlət büdcəsinə hər hansısa əlavə öhdəlik yaradacaqmı?
– Xeyr. Layihə elə bir maliyyə modeli əsasında qurulub ki, onun icrası dövlət büdcəsi üçün heç bir əlavə risk və ya yük formalaşdırmır. “NeoOrdo”nun maliyyələşdirilməsi əsasən özəl və beynəlxalq investisiya mexanizmləri üzərindən həyata keçiriləcək. Uzunmüddətli perspektivdə isə bu təşəbbüs iqtisadi fəallığın artmasına, yeni gəlir mənbələrinin formalaşmasına və dolayısı ilə dövlət maliyyə dayanıqlığının güclənməsinə xidmət edəcək.
– Layihə dövlət siyasəti ilə necə uzlaşır?
– “NeoOrdo” layihəsi Cənab Prezident İlham Əliyevin müəyyən etdiyi inkişaf strategiyasına tam uyğundur. Biz bütün fəaliyyətimizi qanunlar çərçivəsində, dövlət maraqlarına uyğun aparırıq. Bütün məmurlar Prezidentin verdiyi rəsmi tapşırıq və göstərişlərə əməl etməyə borcludur.
– Konkret olaraq desək, “NeoOrdo” nədir?
– “NeoOrdo” nizam, ədalət və texnologiya üzərində qurulan yeni bir sistemdir. Burada insan mərkəzdədir, şəffaflıq əsas prinsipdir, inkişaf davamlıdır. “NeoOrdo” Azərbaycanı proseslərin izləyicisi yox, oyun qurucusuna çevirən modeldir.
– Sizin “Yeni Dünya Düzəni” ilə bağlı baxışlarınız cəmiyyətdə geniş maraq doğurur. Bu barədə nə deyə bilərsiniz?
– Köhnə dünya düzəni artıq öz funksiyasını itirib. Müharibələr, iqtisadi böhranlar, ədalətsizliklər bunu açıq göstərir. “Yeni Dünya Düzəni” gücə deyil, ağla, ədalətə və əməkdaşlığa söykənməlidir. Mən inanıram ki, Azərbaycan bu yeni düzənin kənarında yox, mərkəzində yer almalıdır. “NeoOrdo” bu baxışın real və praktik ifadəsidir.
– Adi Azərbaycan vətəndaşı üçün “NeoOrdo” nə ifadə edir?
– Təhlükəsizlik, sabit gəlir və övladlarının gələcəyinə ümid. “NeoOrdo” adi vətəndaşın həyatına birbaşa toxunur: yeni iş yerləri, peşə imkanları, sosial rifah və daha güvənli gələcək deməkdir.
– Xalqın sizə inanması üçün əsas səbəb nə olmalıdır?
– İnsan sözə yox, niyyətə və əmələ inanır. Mən xalqdan kor-koranə etimad istəmirəm. İzləyin, sual verin, tənqid edin. “NeoOrdo” xalqın gözü önündə, dövlətin nəzarəti altında və qanun çərçivəsində həyata keçiriləcək.
– Sonda Azərbaycan xalqına nə demək istərdiniz?
– Azərbaycan xalqı ağır günlərdən keçib, amma heç vaxt ümidini itirməyib. 44 günlük Vətən müharibəsində göstərilən birlik ruhu sübut etdi ki, bu xalqın gücü tükənməzdir. İndi isə həmin gücü rifaha, inkişaf və sabitliyə çevirməyin zamanıdır. “NeoOrdo” bir nəfərin yox, bütün xalqın layihəsidir. Bu yol birlik yoludur.