“Biz “Arsenal” klubunun Henrix Mxitaryanın öz komandası ilə birgə Çelsiyə qarşı UEFA Avropa Liqasının final oyununda iştirak etmək üçün Bakıya gəlməyəcəyi ilə bağlı bəyanatından məyus olduq”.
Bu sözləri AFFA-nın baş katibi Elxan Məmmədov deyib: ““Arsenal” klubu, oyunçunun özü və ailəsi ilə birgə qəbul edilən bu əsassız qərardan çox təəssüflənirik”.
Baş katib bir daha vurğulayıb ki, Azərbaycan Mxitaryanın təhlükəsizliyinin təminatı ilə bağlı UEFA-nın tələb etdiyi bütün mümkün zəmanəti təqdim etmişdi:
“Azərbaycanın təqdim etdiyi zəmanətin ciddiliyini şübhə altına almaq üçün heç bir əsas yoxdur. Son on ildə çox sayda erməni idmançı hər hansı insident olmadan Azərbaycanda təşkil olunan müxtəlif növ beynəlxalq idman yarışlarında iştirak edib. Nəhayət, hesab edirik ki, məyusluq yaradan bu qərar heç bir şəkildə qarşıdakı böyük oyunun əyləncə və keyfiyyətinə təsir etməyəcək. Səbirsizliklə hər iki komandanı Bakıda gözləyirik”. /qafqazinfo