"Xəzər hövzəsi və enerji təhlükəsizliyi" kitabının təqdimatı keçirilib

16:06 - 10 Dekabr 2018 - Xəbər

Azərbaycan Respublikasının Prezidenti yanında QHT-lərə Dövlət Dəstəyi Şurasının üzvü, Beynəlxalq Münasibətlərin Araşdırılması Mərkəzinin sədri, siyasi elmlər üzrə fəlsəfə doktoru Rufiz Qonaqovun«Xəzər hövzəsi və Enerji təhlükəsizliyi» adlı kitabı işıq üzü görüb.

Kitabın elmi redaktoru və ön sözün müəllifi Azərbaycan Respublikası Prezidentinin İctimai-siyasi məsələlər üzrə köməkçisi-şöbə müdiri, tarix elmləri doktoru, professor Əli Həsənovdur. Ölkəmizin ümummilli lider Heydər Əliyev tərəfindən əsasları qoyulan  balanslaşdırılmış enerji siyasəti kursunun həm də enerji təhlükəsizliyi baxımından təhlili məsələləri, cənab  İlham Əliyev tərəfindən bu siyasətin uğurla davam etdirilməsi prioritetləri, Xəzər ətrafında uzun illər davam edən danışıqlar prosesi, Xəzəryanı dövlətlərin münasibətləri, əldə edilən nəticələrin təhlili  tədqiqatın başlıca məqsəd və vəzifələrisırasındadır.

Təqdimat, Ulu Öndər Heydər Əliyevin əziz xatirəsinin anımı ilə açıq elan edilib. Tədbiri giriş sözü ilə açan Azərbaycan Respublikasının Prezidenti yanında Dövlət İdarəçilik Akademiyasının rektoru, akademik Urxan Ələkbərov müəllif Rufiz Qonaqovu «Xəzər hövzəsi və enerji təhlükəsizliyi»adlı kitabı münasibətilə təbrik etdi.Başlıca prioritetləri Ulu Öndər Heydər Əliyev tərəfindən müəyyən olunan və bu gün Cənab İlham Əliyevin praqmatik siyasi iradəsi ilə balanslaşdırılan Azərbaycanın enerji siyasətinin uğurlarını qeyd edərək«Xəzər hövzəsi və enerji təhlükəsizliyi» kitabının  Xəzərin hüquqi statusunun müəyyən olunduğu bir vaxtda ərsəyə gəlməsinin əhəmiyyətindən danışdı.

Kitabın rəyçilərindən olan millət vəkili, professor Elman Nəsirov sözügedən elmi-tədqiqat əsəri haqqında çıxış edərək RufizQonaqovun elmi-ictimai mühitdə aktual olan tədqiqat əsərinin əhəmiyyətini vurğulayaraq iştirakçılara söz verdi.
Milli Məclisin Komitə sədri Siyavuş Novruzov bu gün enerji təhlükəsizliyinin enerji resurslarının kəmiyyəti qədər vacib əhəmiyyət daşıdığını bildirdi. Həmçinin qeyd etdi ki, müəllif kitabda dünya enerji təhlükəsizliyi məsələləri ilə bağlı ayrı-ayrı dövlətlərin enerji siyasətini təhlil edib, problemin nəzəri və təcrübi aspektlərinə xüsusi yer ayırıb, dünyada baş verən konfliktlər konteksində Xəzərin statusu ilə əlaqədar Xəzəryanı dövlətlər arasında əldə edilmiş konsensusun beynəlxalq hüquqi və politoloji əhəmiyyətini uğurla tədqiq etməklə yanaşı, hövzə dövlətləri arasında Azərbaycanın potensial imkanlarını və onun üstün cəhətlərini sistemli şəkildə müqayisə edib.  
Millət vəkili, akademik Ziyad Səmədzadə ölkəmizin XXI əsrdə enerji və enerji təhlükəsizliyi məsələləri istiqamətində ən sabit ölkə olacağını, bu gün Cənab İlham Əliyev tərəfindən davam etdirilən böyük layihələrin həm də regionu sabitlik diyarına çevirəcəyini bildirdi.
    Kitabın daha bir rəyçisi olan fəlsəfə elmləri doktoru, professor Rəna Mirzəzadə müasir insan amilinin inkişafında enerji və enerji təhlüksizliyinin  vacibliyindən bəhs etdi.Kitabda bu məsələlərə müqayisəli yer ayrıldığını bildirdi.
Daha sonra, fəlsəfə elmləri doktoru Rövşən Məmmədov,BP şirkətinin vitse-prezidenti Bəxtiyar Aslanbəyli,siyasi elmlər üzrə fəlsəfə doktoru, dosent Hüseyn İbrahimov«Xəzər hövzəsi və enerji təhlükəsizliyi» kitabının geniş oxucu, eləcə də ekspertlər üçün vacib əhəmiyyət daşımasının aktuallığından söz açaraq bu gün nəinki regionda, eləcə də dünyada aktual paradiqma hesab edilən “enerji təhlükəsizliyi”nin təhlili məsələlərinin vacibliyindən bəhs etdilər.Tədbirdə xarici ölkələrin – xüsusən Xəzəryanı ölkələrin səfirləri və səfirlik nümayəndələri  də iştirak və çıxışlar edib.

 Tədbirin sonunda siyasi elmlər üzrə fəlsəfə doktoru Rufiz Qonaqov tədbir iştirakçılarına dərin minnətdarlığını bildirdi və müasir Azərbaycan dövlətinin uğurlu enerji siyasəti ətrafında gələcəktədqiqatların müqayisəli metodlarla  sistemləşdirilməsi zərurətindən bəhs edərək, Bakı-Tiflis-Ceyhan neft kəmərindən sonra TANAP, TAP kimi iri layihələrin  nəinki  regionda eləcə də dünyada mühüm sabitlik mənbəyi olacağını tədbir iştirakçılarının nəzərinə çatdırdı. Müəllif Ulu Öndər Heydər Əliyevin sitatını tədbir iştirakçılarının diqqətinə çatdırdı “Əsrin müqaviləsi ilə qoyduğumuz təməl XXI əsrdə Azərbaycan xalqının inkişafı, firavan həyatı, müstəqil Azərbaycan dövlətinin suverenliyinin daha da möhkəmlənməsi üçün gözəl imkanlar yaradır və inanıram ki, XXI əsr müstəqil Azərbaycan dövləti üçün ən xoşbəxt dövr olacaqdır”. Məhz əsrin müqaviləsindən sonra Azərbaycanın beynəlxalq arenada tanınmasını və bir çox beynəlxalq səviyyəli layihələrə ölkəmizin qoşulmasının zəruriliyini qeyd edən Rufiz Qonaqov bu davamlı inkişaf siyasətinin  uğurla Cənab Prezident İlham Əliyev tərəfindən davam etdirilməsini diqqətə çatdırdı. Rufiz Qonaqov Azərbaycanın təkcə tranzit ölkə deyil, həm də enerji mənbələri ilə zəngin olan bir ölkə olduğunu vurğuladı və Azərbaycanın öz enerji tələbatını daxili imkanları hesabına təmin etdiyini bildirdi.

Müəllif Cənab Prezident İlham Əliyevin uğurlu siyasətinin nəticəsində Azərbaycanda qaz ehtiyatlarının həcminin artmasını, milli enerji siyasətində qaz amilinin ön plana keçməsini, siyasi prizmada tranzit ölkələrdən asılılığın aşağı düşdüyünü, iqtisadi və geosiyasi maraqları olan güclü dövlətlərin, regional və qeyri-regional ölkələrin cəlb edilməsi ilə Azərbaycanın beynəlxalq aləmdə nüfuzunun artdığını çıxışında qeyd edərək tədbir iştirakçılarına bir daha öz dərin minnətdarlığını bildirdi. 


Xəbər xətti