Bakıda bankda zamin duran qadın həbs edilib

11:14 - 20 Oktyabr 2017 - HADİSƏ

Bakıda kredit götürən şəxsə zamin duran qadın həbs edilib. Ucnoqta.az Lent.az-a istinadən xəbər verir ki, bu barədə tanınmış hüquqşünas Əkrəm Həsənov məlumat yayıb. O bildirib ki, Sabunçu rayon Məhkəməsinin qərarı ilə “AtaBank”dan kredit götürən şəxsə zamin duran qadın həbs edilib.
Belə ki, hakim Süleyman Ağayev “AtaBank”dan götürülən kreditə zamin duran Lalə Bunyatovanı 10 gün müddətinə inzibati qaydada həbs edib.
Buna səbəb isə onun zamin durduğu şəxsin banka 8701 manat borcu qalmasıdır.
L.Bunyatova “Azərbaycan Dəmir Yolları” QSC-nin əməkdaşıdır.
Ə.Həsənov qeyd edib ki, icra məmuru qadının iş yerini müəyyən etməyib və əmək haqqına tutma yönəltmək əvəzinə xanımın həbsi barədə məhkəməyə təqdimat verib. Əsas həm də odur ki, xanım borc üzrə haqqında məhkəmə qərarının olmasını yalnız oktyabrın 4-də, həbsindən 13 gün əvvəl bilib. Buna qədər ona heç bir sənəd göndərilməyib.
Vəkil bildirib ki, qərardan apellyasiya şikayəti veriləcək.
Qeyd edək ki, bank kredit borcu olan şəxsin özünü tapa bilməyib.

Xəbər xətti