Hərbçi güləşçilərin dünya çempionatı başlayır

10:46 - 18 Sentyabr 2017 - İDMAN

18-25 sentyabr 2017-ci il tarixdə Litvanın Klaypeda şəhərində hərbçi güləşçilər arasında 32-ci Dünya çempionatı keçiriləcək. Azərbaycan Güləş Federasiyasından Trend-ə verilən məlumata görə, sərbəst güləş yarışlarında ölkəmizi Əfqan Xaşalov (57 kq), Qalib Əliyev (61 kq), Ağahüseyn Mustafayev (65 kq), Coşqun Əzimov (70 kq), Rəşad Yusifli (74 kq) və Əşrəf Əliyev (86 kq) təmsil edəcək. Yunan-Roma güləşçilərindən Murad Məmmədov (59 kq), Kərim Cəfərov (66 kq), Sənan Əlmirzəyev (71 kq), Həsən Əliyev (75 kq), Elton Vəzirzadə (80 kq), İslam Abbasov (85 kq), Orxan Nuriyev (98 kq) və Cavid Feyziyev (130 kq) yarışlara qatılacaq. Qadın güləşçilərin mübarizəsində isə Türkan Nəsirova (48 kq) və Tatyana Varantsova (53 kq) iştirak edəcək. Komandaya Dünya çempionatında məşqçilər Nazim Əlicanov və Taleh İsrafilov rəhbərlik edəcək. Çempionatın proqramına əsasən, ilk yarış günündə sərbəst güləş üzrə 57 kq, 61 kq, 65 kq, 70 kq və qadın güləşi üzrə 48 kq, 53 kq, 55 kq, 58 kq çəkidə qaliblər müəyyənləşəcək. Sentyabrın 21-də isə xalçaya 74 kq, 86 kq , 97 kq, 125 kq çəkidə sərbəst, 60 kq, 63 kq, 69 kq və 75 kq çəkidə qadın güləşçilər çıxacaq. 59 kq, 66 kq, 71 kq və 75 kq çəkidə yunan-Roma güləşçiləri sentyabrın 22-də, 80 kq, 85 kq, 98 kq və 130 kq çəkidə yunan-Roma güləşçiləri isə son yarış günündə mübarizə aparacaq. Görüşlərin idarə edilməsində ölkəmizi beynəlxalq dərəcəli hakim Elman İsmayılov təmsil edəcək. Sentyabrın 24-də isə çempionatda iştirak edən ölkələrin Mədəniyyət Günü keçiriləcək. Xatırladaq ki, ötən ilki Dünya çempionatını sərbəst güləşçilərimiz 1 qızıl, 1 gümüş və 1 bürünc, yunan-Roma güləşçilərimiz isə 1 qızıl, 3 gümüş və 2 bürüncmedalla başa vurub.

Xəbər xətti