"Pana Film"in sahiblərindən olan Necati Şaşmaz və Mehmet Canpolatla bağlı məhkəmə qərarı verilib. Axşam.az-ın "Hürriyet"ə istinadən məlumatına görə, şirkət iyulun 15-də baş verən hərbi qiyamdan əvvəl o mövzuda film çəkmək üçün "Kurtlar Vadisi Darbe" adını aldıqları üçün ittiham edilirdi. N.Şaşmaz və M.Canpolat terror təşkilatına üzv olmaq və FETÖ ilə münasibət saxlamaq iddiaları ilə məhkəməyə verilmişdi.
Araşdırma zamanı ifadəsi alınan Şaşmaz "Kurtlar Vadisi Darbe"ni serial olaraq 100 seriyalıq çəkmək istədiklərini deyib. O, ssenarinin FETÖ-nün 17-25 dekabr əməliyyatları ilə bağlı olacağını bildirib:
"Kurtlar Vadisi Darbe" adını almağımızın tək səbəbi isə markamızı qorumaq idi. Ssenari 15 iyul hadisələri ilə bağlı deyil".
Məhkəmə Necati Şaşmaz və Mehmet Canpolatın silahlı terror təşkilatı FETÖ ilə əlaqəsinin olmadığını təsdiqləyib və şübhəlilərlə bağlı ittihamları düşürərək onlar haqda araşdırmaya son verib.