Postsovet məkanında münaqişələrin nizamlanması təcrübəsi göstərir ki, formatın genişləndirilməsi nəticə vermir. Bunu Ukraynanın sabiq prezidenti, hazırda Ukrayna problemi ilə bağlı “Təmas qrupu”nda rəsmi Kiyevi təmsil edən Leonid Kuçma "Fokus" jurnalına deyib.
O, bu məsələyə ABŞ və ya digər ölkələrin Ukrayna problemi üzrə Minsk prosesinə qoşulma ehtimalı ilə bağlı danışarkən toxunub. Kuçma deyib ki, bu, prosesə xələl gətirə bilər.
"İkincisi, postsovet məkanında digər münaqişələrin nizamlanması təcrübəsi onu deməyə əsas verir ki, hətta genişləndirilmiş formatlar da real nəticələr vermir", - deyə o bildirib və doqquz ölkənin daxil olduğu Ermənistan-Azərbaycan, Dağlıq Qarabağ münaqişəsinin sülh yolu ilə həlli qrupunu nümunə gətirib.
Bununla yanaşı Kuçma qeyd edib ki, üçtərəfli kontakt qrupu köməkçi rol oynayır.