Yaponiyada milyonçu təxminən 30 milyon yen pulunu dələduzluq yolu ilə mənimsəyən 24 yaşlı məşuqəsini qətlə yetirdiyinə görə 16 il həbs cəzasına məhkum edilib.
Ucnoqta.az xəbər verir ki, bu barədə Daily Shincho məlumat verib.
57 yaşlı Akira İşikava 2022-ci ildə 24 yaşlı Sana Hirabayaşi ilə internetdə tanış olub. Bir müddət sonra o, menecer işlədiyi kafedə borclarını ödəmək üçün 10 milyon yen lazım olduğunu bildirib.
İşikava gənc sevgilisinə bu məbləği verib. Daha sonra Hirabayaşi ondan daim pul istəməyə başlayıb. Xüsusilə, o, hər görüş üçün ondan 100.000 yenə qədər pul alıb.
İşikava əvvəllər Fuji Xerox şirkətində işləyib. 2018-ci ildə təqaüdə çıxıb və 60 milyon yen məbləğində təzminat alıb. Müstəntiqlərin sözlərinə görə, Hirabayaşi ondan bu məbləğin ən azı yarısını aldadıb.
Məhkəmə sənədlərinə görə, Hirabayaşi ilə münasibətlərinin xərcləri İşikavanı "emosional və maddi cəhətdən tükəndirib".
Bundan əlavə, o, maliyyə çətinliklərini məşuqəsinə danışanda, xanım ona iş tapmağı məsləhət görüb və bu da aralarında mübahisəyə səbəb olub. 2 fevral 2023-cü il tarixində, saat 2:00-da İşikava və Hirabayaşi Tokioda bir otelə yerləşiblər. Qadın yuxuya gedəndə kişi onu bıçaqlayıb və sonra qaçıb.
Hökm çıxarılmazdan əvvəl İşikavadan Hirabayaşinin yalnız pul üçün onunla olduğunu başa düşüb-düşmədiyi soruşulub. O, bunu qismən başa düşdüyünü, lakin yenə də onu nişanlısı kimi gördüyünü bildirdi.
Müdafiə tərəfi 2015-ci ildə İşikavaya bipolyar pozğunluq da daxil olmaqla bir sıra ruhi xəstəliklər diaqnozu qoyulduğuna əsaslandı. Buna baxmayaraq, məhkəmə onun cinayəti bilərəkdən, eqoist və mülkiyyət niyyəti ilə törətdiyinə qərar verdi.