Ana səhifə
23 Sentyabr 2018

Azərbaycanın biznesmen deputatları... - (Araşdırma)

Dünyanın bir çox ölkələrində parlament üzvləri öz gəlirlərini açıqlayır, gəlir deklarasiyalarını təqdim edirlər. Deputat mandatı daşıyanlar arasında məşhur holdinq rəhbərləri, milyonçular və iş adamlarına da rast gəlmək mümkündür. 

 

Bu yaxınlarda Ermənistan parlamentinin deputatları 2013-cü il üçün mülk və gəlir haqqında öz deklarasiyalarını təqdim ediblər. Erməni mətbuatının yaydığı məlumata görə,parlamentdə 19 milyonçu (dollarla götürüldükdə) deputat var. Onlardan 9-u hakim “Respublika” və “Çiçəklənən Ermənistan” partiyalarının üzləri, yalnız bir nəfər (Araik Qriqoryan) isə bitərəfdir. 

2013-cü ci ilin yekunlarına görə, erməni deputatlar deklarasiyada ümumilikdə 49,1 milyard dram, 80,7 milyon dollar və 27,1 milyon avro gəlirləri olduğunu göstəriblər. Ermənistan parlamentində ən varlı fraksiya “Çiçəklənənə Ermənistan”dır. Belə ki, onun deputatlarının ümumi gəlirləri 163,6 milyon dollardır. Parlamentdə ən varlı deputata elə həmin fraksiyanın rəhbəri Qarik Çakuryandır. Onun 134,2 milyon dollar gəliri olduğu bildirilir”.

Nədənsə Azərbaycan Parlamentinin üzvlərinin gəlirləri ictimaiyyətə məlum deyil. Deputatlarımız arasında milyonçuların olub-olmaması da bəlli deyil. Buna baxmayaraq mətbuat kluarlarında qeyri-rəsmi olaraq deputatlarımızın gizli saxladıqları biznesləri ilə bağlı müxtəlif məlumatlar yayılır. 

Ucnoqta.az” Azvision.az-a istinadən, Milli Məclis üzvlərinin bəzilərinin biznesi barədə məlumatları təqdim edir:

 

Bu günlərdə yaxın qohumunu həbs etdirməsi xəbəri ilə gündəmə gələndeputat Əsabil Qasımov 2010-cu ildə deputat seçilənə qədər “Karat” MMC şirkətinin prezidenti olub. 2006-cı ildə “Karat” MMC-nin də daxil olduğu “Karat Holdinq” yaradılıb. İki il sonra “Karat” MMC mənzil-tikinti kooperativi (MTK) kimi qeydə alınıb. Həmin holdinqdə və MTK-da idarəçiliyi Ə.Qasımov deputat seçiləndən sonra yaxınlarına tapşırıb. 

Mətbuatda yer alan məlumata görə, “Karat Holdinq"in tərkibinə Karat MTK, İdeal MMC, İzmir MMC (tikinti şirkətləri); Azinvest Tikinti Şirkəti; Everest-M, Şin Servis (armatur alqı-satqısı); Karmen MMC (dəyirman və un alqı-satqısı); Hökməlidə Makaron Fabriki, Hökməlidə Kisə Fabriki; ASTEL MMC (Məhəmmədi, Mehdiabad və Şamaxıda Quşçuluq Fabrikləri), Taxıl Anbarları və Dəyirman Kompleksləri (Şəkidə, Kürdəmirdə, Marneulidə və Gürcüstanın müxtəlif bölgələrində); Gəncə Fatoğlu (un dəyirmanı); Bakı şəhəri, Zərifə Əliyeva küçəsində 18 mərtəbəli iki Marina Plaza oteli; Zərifə Əliyeva küçəsində iki mərtəbəli restoran; Bakı şəhəri Səməd Vurğun küçəsində Ağ Saray Binası; Bakı şəhəri Xan Şuşinski küçəsi 12, İmran Qasımov küçəsi 16, Qulu Quliyev küçəsi 21, Süleyman Rüstəm küçəsi 61-də yerləşən 18 mərtəbəli dörd bina; İzmir küçəsi 7A və 7B-də yerləşən 19 mərtəbəli iki bina; Zərifə Əliyeva küçəsi 53-də yerləşən 23 mərtəbəli bir bina, Süleyman Rüstəm küçəsi, 61-də yerləşən "Premium Market" daxildir.

Bu şirkətlər rəsmən Əsabil Qasımovın adına olmasa da holdinqin onun nəzarəti altında olması şübhəsizdir. 

Qardaşı oğlunun qətl törətməsindən sonra deputat Hüseynbala Mirələmovun sahibi olduğu restoranın adı mətbuata məlum oldu. Belə ki, deputatın qardaşı oğlu “1001 gecə” restoranında silahla bir nəfəri öldürüb, bir neçə nəfəri yaralamışdı. Bundan sonra H.Mirələmov mətbuata açıqlamasında həmin restoranın ona məxsus olduğunu təsdiqləmişdi.

Milli Məclisin Sosial siyasət komitəsinin sədri, Lənkəranın deputatı Hadı Rəcəblinin də fəaliyyəti dövründə özünə yaxşı biznes qurduğu deyilir. Hərçənd ki, deputat bunu inkar etsə də Lənkəranda dəniz kənarında yerləşən möhtəşəm “Palıdlı sahil” ailəvi istirahət mərkəzinin ona məxsus olması haqda mətbuatda dəfələrlə məlumat yayılıb. Bundan əlavə deputatın Lənkəran və paytaxt Bakıda da bir neçə biznes obyektlərinin olduğu deyilir. 

Lənkəranın digər deputatı Rüfət Quliyevin adı biznesmen deputatlar sırasında hallanır. O, “European Tobacco Baku” ASC İdarə Heyətinin sədridir. “European Tobacco Baku” ASC ölkəmizdə tütün məmulatlarının istehsalını yerinə yetirir. "European Tobacco"nun potensial gücü Azərbaycanda siqaretə tələbatın 80-85 faizini qarşılamağa imkan verir. 

Deputat Cavanşir Feyziyev “Avromed” şirkətinin təsisçisidir. C.Feyziyev deputat olmaqla yanaşı dərman biznesi ilə də məşğul olur. Hazırda “Avromed” bütün dərman bazarına nəzarət edir.

Əhməd Vəliyev deputat olması ilə yanaşı Odlar Yurdu Universitetinin rektoru kimi tanınır. Həmçinin deputatın “Jalə-Biznes” MMC, “Jalə Plaza”, “Muğanbank” ASC və “Oksigen” klinikasına sahiblik etdiyi barədə dəfələrlə mətbuatda yazılar gedib.

Masallının keçmiş icra başçısı Qəzənfər Ağayevlə yaxın münasibətlərə sahib olan deputat Nəriman Əliyevin adıçəkilən rayonda bir sıra iri obyektlər sahibi olduğu deyilir. N.Əliyev Masallıda biznesmen kimi ad çıxarıb. 

Milli Məclisin digər üzvü Xanlar Fətiyev deputat olmaqla yanaşı Gəncə Avtomobil Zavodunun direktorudur. Deputatın Gəncə şəhərində bir neçə biznes obyektlərinin olduğu deyilir. 

Deputat Malik Həsənov Əmlak Məsələləri Dövlət Komitəsinin sədri olan qardaşı Kərəm Həsənova məxsus “Azinko” tikinti şirkətini idarə edir. 

Deputat Ərəstun Cavadov Mərkəzi Univermağın İdarə Heyətinin sədridir. Deputatın Ağsu rayonunda bir neçə obyekti var.

Kürdəmirin deputatı Fərhad Qəribov bizneslə məşğul olan parlament üzvlərindəndir. Onunla biznesi ilə bağlı mətbuatda dəfələrlə yazılıb. Məlumatlara görə, Bakıda yerləşən “Çıraq Plaza”, “Şəki” restoranlar şəbəkəsi Fərhad Qəribova məxsusdur. 

Bundan əlavə deputat “Debütbank”ın rəhbəridir. F.Qəribov həmçinin Bakıda bir neçə obyektin sahibidir.

Salyandan seçilən deputat, ehtiyatda olan general-leytenant Əliağa Hüseynov biznesi olan deputatlardandır. Paytaxtın Həsən bəy Zərdabi prospekti, 20-də, metronun "20 Yanvar" stansiyasının yaxınlığında yerləşən "Atlantis" şadlıq sarayı və “Adanalı Hasan Kolcuoğlu” restoranının ona məxsus olduğu bildirilir. Deputatın bundan əlavə Salyanda ferması da mövcuddur. 

Ölkədə bir sıra məmur və deputatlar bizneslə məşğul olsa da adətən bu işi qohumlarının, yaxınlarının adına sənədləşdirirlər. Deputat Rafael Cəbrayılovun tikinti biznesi ilə məşğul olduğu deyilir. Deputat mətbuata verdiyi müsahibələrində bunu inkar edərək özünün yox, qardaşlarının tikinti şirkətlərinin olduğunu qeyd edib.

Ümumiyyətlə, parlamentdə başqa deputatlar da var ki, biznes fəaliyyəti ilə məşğul olduqları deyilir. 

 

Tarix
24 Oktyabr 2014 [17:34]
Müəllif
Üç nöqtə
Digər xəbərlər
Foto
Video
Çox oxunanlar
Sorğu
Kommunal qurumların işi sizi qane edirmi?
 bəli
 xeyr
KİV
Virtual Qarabağ

Ən son xəbərləri səhifəmizdən də izləyin