Bakının yolları hava hücumuna məruz qalıb

Hər dəfə Bakı şəhərinin icra başçısı Hacıbala Abutalıbov haqqında yazı yazanda içimidə bir səs mənə deyir ki, nə yazırsan yaz, xeyiri yoxdu. Həm də nədəndirsə, Bakının həllini gözləyən problemlərindən yazanda məndə baş ağrıları başlayır, təzyiqim qalxır, ürəyim həyəcanla döyünür. Düz bir aya yaxındır Bakı qara, borana və hərdən bir də çovğuna təslim olub. Olmaya da bilməzdi. Çünki Bakı elə bir icra başçısının əlindədir ki, o, hər nəyə desən təslim olur. Adicə yağış yağır, Bakı təslim olur, külək bərk əsir, təslim olur. Yağış yağanda küçələr keçilməz olur, kanalizasiya işləmir. Külək əsəndə isə ağaclar, binaların damları qopub tökülür. Qar və çovğun isə daha ciddi problem yaradıb. Daim həsəd aparan yadellilərə təslim olmayan Bakı qara necə yüksək səviyyədə təslim olubsa, qardan sonra şəhərimizə yeni gələnlər elə bilər ki, buranı bombalayıblar. Nabələd adama desən ki, Bakıya qar yox, bomba yağıb, o saat inanar. Çünki küçələrimiz, yollarımız çala-çuxur olub. Bir şeyi başa düşmüşəm ki, neçə illərdir Bakı havadan hücuma məruz qaldıqda dərhal təslim olur, heç bir müqavimət göstərmir. Yalnız hücumdan sonra tör-töküntünü yığışdırmaqla məşğul olurlar. Yol kənarlarında qarı, buzu qoca arvadlar, yaşlı insanlar əllə təmizləyirlər. Hava hücumundan qoruna bilməyən Bakının icra başçısı Hacıbala Abutalıbov isə öz bahalı  «BMW-745»ində ora-bura hərəkət edir. Onun bu yolları düzəltmək heç marağında da deyil. Nəyinə lazım? Çünki onun mindiyi maşında amartizasiya o qədər güclüdür ki, maşın çökəyə düşəndə hiss olunmur. Həm də ki, axı Hacıbala müəllimin çala-çökək yollarda nə işi var?
Təzə-təzə işə başlayanda hara gedirdik onu görürdük. İndi isə köhnəlib, gözə dəymir. Onu kimsə görəndə qaçıb qohum-qonşudan, dost-tanışdan muştuluq istəyir ki, Hacıbala Abutalıbovu görmüşəm. Bunun səbəbi nədir, heç bilirsinizmi? Yoldaş Abutalıbov həmişə deyərdi ki, mən bu dövlətin əsgəriyəm. Təzə əsgər həmişə sözəbaxan, iş görən olur. Köhnə əsgərlər isə orda-burda yeyib yatır və günlərini yola verir. Hacıbala Abutalıbov da eynən belə edir. Ona görə də, köhnə əsgərləri xidmətdən tərxis eləyib yola salmaq lazımdır. Axı hər şeyin öz vaxtı var. Hər bir vəzifənin də öz maraqlı günləri, ayları və illəri olur. İndi bu vəzifə yoldaş Abutalıbov üçün yəqin ki, maraqlı deyil. Çünki onun öz işinə əvvəlki maraqla yanaşmadığı artıq göz önündədir. Yer gəldi-gəlmədi deməliyəm ki, göz önündə başqa bir məsələ də var: Hacıbala Abutalıbovun həvəsli vaxtlarında çəkdirdiyi yollar dağılıb bərbad hala qalmışdı. Üstəlik, bu ay yağan yağıntılar, Bakının havadan hücuma məruz qalması şəhərimiz lap bərbad hala qalıb. Axırıncı dəfə Qorbaçovun ata Corc Buşla okeanda görüşündən üç gün əvvəl asfaltlanmış Bakının gözdən iraq, yəni kənd və qəsəbə yolları indi erməni işğalı altında olan yollarımızdan da bərbad hala düşüb. Çala-çuxurlar dolub palçıqlı su ilə. Konduktorluqdan sürücülüyə yüksələn təcrübəsiz avtobus sürücülərinin və digər yaramaz sürücülər isə həmin çala-çökəyə elə düşürlər ki, palçıqlı su küçələrimizi bəzəyir, süni ağacları, gülləri sulayır. Məlum məsələdir ki, dayanacaqdan başqa hər yerdə avtobus gözləyənlər, avtobusdan düşənlər çoxdur. Belələri gündə 3 dəfə palçıqlı su ilə pulsuz çimirlər və onları palçığa bulayan sürücülər də xoş sözlər eşidərək feyziyab olurlar. Beləcə, şəhərimiz döyüşdən çıxmış vəziyyətdə gözləyir. Gözləyir ki, «Eurovision-2012» yarışması tez başlasın ki, bütün bu problemlər də həllini tapsın, yollarda, küçələrdə «mərmidən zərbə alaraq deşik-deşik olmuş» yollarımız düzəlsin. Düzəlməyə düzəlsin, amma müsabiqədən 6 ay sonra dağılsa, mən yenə Hacıbala Abutalıbovdan yazacam. Çünki bütün işlərin açarı onun əlindədir…
Biz hamımız yoldaş Abutalıbovun musiqiyə olan həvəsini hamımız bilirik. Çünki Bakıda ilk dəfə musiqili fontanları məhz xalqın sevimli övladı olan Hacıbala yoldaş quraşdırdı. Üstəlik, dünyanın ən populyar musiqi yarışiması olan «Eurovision-2012»nin açarları artıq neçə gündür Bakının icra başçısına verilmişdir. Və dünən mən bir daha şahidi oldum ki, Hacıbala Abutalıbov musiqini həqiqətən sevir. Rok musiqisinə də biganə deyilmiş. Onun xidməti maşınında DYP tərəfindən qadağan olunmuş yüksək səs effekti olan «danq-danq» siqnalı (avtoşlar buna «fifa» siqnalı deyir və qiyməti də min manatdan bahadır) eşidildi. Özü də 134 nömrəli məktəbin qarşısında. Hansı ki, məktəbin qarşısında siqnal vermək qadağandır. Bununla bağlı həmin ərazidə xüsusi işarə də var. Qadağan olunmuş siqnal qadağan olunimuş yerdə səslənirsə, bu, musiqiyə olan məhəbbətdən irəli gəlir.