Türkiyədə Şanlıurfanın Siverek rayonundakı bir liseydə atışma baş verib.
Ucnoqta.az Türkiyə mətbuatına istinadən xəbər verir ki, bir nəfər ov tüfəngi ilə liseyə girib və aralarında şagirdlər də olan 16 nəfəri yaralayıb.
Hadisə səhər saatlarında rayonun Rüştü Küçükömer küçəsində yerləşən Əhməd Koyuncu Peşə və Texniki Anadolu Liseyində baş verib.
Yaxınlıqdakı sakinlərin məlumatına görə, hadisə yerinə polis və tibb qrupları göndərilib. Təcavüzkarın məktəbin içərisində gizləndiyi, şagirdlər də daxil olmaqla 16 nəfərin yaralandığı bildirilib.
Şübhəli qrupların xəbərdarlıqlarına baxmayaraq təslim olmaqdan imtina etdikdən sonra əraziyə xüsusi əməliyyat bölmələri də göndərilib. Polis hadisə yerində geniş təhlükəsizlik tədbirləri görüb.
Digər tərəfdən, yaralı şagirdlərdən bəzilərinin atışmadan qaçmaq üçün pəncərələrdən tullanıblar. Məktəbdəki şagirdlərin əksəriyyətinin təhlükəsizlik qüvvələri tərəfindən təxliyə edildiyi bildirildi. Təcavüzkarın məktəbin keçmiş şagirdi olduğu, yalnız doqquzuncu sinfə qədər orada oxuduğu və sonra açıq lisey proqramına qatıldığı qeyd edilib. 2007-ci il təvəllüdlü şəxs polis onu tutmağa çalışarkən məktəbin içərisində özünü güllələyərək intihar edib.